Ons is 'n saamstaan-gemeenskap – mense met harte wat sê: "Hier's my hand!" om ons gemeenskap met opvoeding, opleiding en ontwikkeling te laat groei en floreer.

Ons roeping is om Afrikaner-gemeenskappe in ons streek te bemagtig deur strukture te skep wat die gemeenskap kan ontwikkel en welstand verseker. Ons rus ons mense toe met kennis, vaardighede en hulpbronne sodat hulle self die boustene van 'n hoopvolle toekoms kan word.

Deur ons werk reik ons uit na kwesbare groepe – kinders, ouer persone, gesinne en persone met gestremdhede – en help hulle om volhoubare oplossings vir hul uitdagings te vind. Ons streef daarna om armoede te verlig en te voorkom en om die armoedesiklus te verbreek deur mense te bemagtig met opvoeding, opleiding en ontwikkeling. Só skep Helpende Hand vir individue die kans om hul eie helpende hand te gebruik – dié aan die punt van hul eie arm – om hulself en ander te help.

Die Helpende Hand Vrystaat-streek, is 'n gemeenskap van streekspersoneel en vrywilligers wat hande vat om netwerke te bou en projekte aan te pak. Ons neem met trots deel aan nasionale inisiatiewe soos die Kosblikkie-, HelpJag-, Skooltassie- en StopHonger-projek wat almal daarop gemik is om hoop te bring waar dit die nodigste is.

Ons Ons Winkels speel 'n belangrike rol om werksgeleenthede te skep, maatskaplike werkers se salarisse te ondersteun en studiefondse te bou vir jongmense wat andersins nie sou kon studeer nie.

Die Helpende Hand Vrystaat-streek sê vandag: Hier's my hand – kom vat hande met ons. Saam bou ons met hart, in krag, tot hoop aan 'n beter môre vir ons gemeenskap.