Ons is 'n boere-gemeenskap, 'n saamstaan-gemeenskap wat sê: "Hier's my hand!" om ons gemeenskap met opvoeding, opleiding en ontwikkeling te laat vooruitgaan! Ons doelwit is om die Afrikaner-gemeenskappe in ons streek deur middel van maatskaplik gebaseerde gemeenskapsontwikkeling te bemagtig met kennis, vaardighede en strukture. Sodoende help ons die kwesbare groepe – kinders, bejaardes en persone met gestremdhede – om volhoubare oplossings te vind vir hul uitdagings.

Ons probeer ook om armoede te verlig en voorkom en om die armoedesiklus te verbreek met opvoeding, opleiding en ontwikkeling waardeur ons individue met kennis en vaardighede bemagtig. So skep Helpende Hand vir individue die geleentheid om die beste helpende hand, daardie hand aan die punt van hul eie arm, te gebruik om hulself te help.

Die Helpende Hand Vrystaat-streek sluit die Bo-Karoo en Orania in. Saam bou ons streekspersoneel en vrywilligers netwerke en pak tak- en streeksprojekte aan. Ons neem ook deel aan nasionale projekte soos die Kosblikkie-, HelpJag-, Skooltassie- en StopHonger-projek. Die Ons Winkels help om werkgeleenthede te skep, maatskaplike werkers se salarisse te betaal en studiefondse op te bou vir jongmense wat anders nie sou kon gaan studeer nie.

Helpende Hand Vrystaat-streek sê: Hier's my hand. Kom vat hande met ons en raak deel van die Helpende Hand-familie. Kom droom saam – met hart, in krag, tot hoop!